Hér er slóðin á að taka prófið – https://www.viacharacter.org/

Þú smellir á að þú ætlir að taka ,,Take free survey” og þá færðu upp síðu þar sem þú þarft að skrá þig (Register). Þú þarft að skrá þig svo inn , skrá inn nafn og email og svo velur þú þar á hvaða tungumáli þú vilt taka prófið (búið að þýða á íslensku auk 50 annarra tungumála). Gefur fleirri upplýsingar um þig s.s. kyn og velur þér leyniorð.

Þegar þú ert þar með komin inn formlega á síðuna, velur þú fullorðinsprófið: Adult Via Character survey.

Í stað upplýsinganna um þig sem þú gefur upp, færðu að taka prófið ókeypis – og prófið er tengt háskólanum í Pennsilvania og þar vinna nemendur rannsóknir úr niðurstöðunum.

Að taka prófið tekur um korter til 20 mínútur.

Svör þín á þessum prófum vistast sjálfkrafa.

Þú getur því alltaf skoðað niðurstöðurnar.

Og ef þér leiðist að taka prófið – tekur þú bara pásu og ferð svo inn aftur og þá hafa svörin þín vistast og þú getur haldið áfram þar sem frá var horfið.

Ég fékk styrk frá Embætti Landlæknis til að þýða hið þekkta og mikið rannsakaða VIA Strength Skapgerðar styrkleikaprófið. Það þurfti síðan að fara í hendur miklu fleiri, enda meiri vinna en ég taldi í byrjun t.d. sviðsstjóra Embættis Landlæknis og nemendahóps hjá Endurmenntun í jákvæðri sálfræði og var marg þýtt úr ensku í íslensku og til baka á ensku. Þetta er svo sem allt aukaatriði, aðalatriðið er að nú er hægt að taka þetta próf Á ÍSLENSKU 🙂

Hér getur þú lesið meira um þetta próf https://hrefnagudmundsdottir.wordpress.com/2015/01/22/mannkostir/

Um er að ræða 24 styrkleikar eða dyggðir sem verið er að mæla – út frá 6 yfirflokkum.

Það er sjálfsagt að koma í einkatíma til mín til að rýna betur í niðurstöðurnar og skoða nýjar leiðir til að nýta styrkleikana –það hefur verið sýnt fram á með rannsóknum að vellíðan eykst við að finna nýjar leiðir við að nýta styrkleikana og árangur allt að 20%. Að nota styrkleika sína skapar framfarir og meiri vellíðan – eykur sjálfsþekkingu og er ein leiðin til aukinnar hamingju.

Síðan ertu hér með komin með verkfæri, skoða efstu styrkleika þína og skoða – hvernig getur þú notað þá til að takast á við það sem þér finnst erfitt, krefjandi eða leiðinlegt.

Það er svolítið merkilegt hvað áherslan hefur þróast. Fyrir 15–20 árum snerust styrkleikarannsóknir mikið um að auka hamingju og ánægju. Nú er sífellt meiri áhersla lögð á að styrkleikar hjálpi fólki að mæta áföllum, streitu, breytingum og óvissu. Með öðrum orðum: styrkleikarnir eru ekki bara leið til að blómstra þegar allt gengur vel, heldur líka það sem hjálpar okkur að standa af okkur stormana.

Ég held að þetta sé einmitt ástæða þess að VIA-styrkleikarnir hafa orðið svona mikilvægir í markþjálfun, leiðtogafræði, menntun og heilbrigðisstarfi. Þeir færa fókusinn frá því að „laga fólk“ yfir í að spyrja:

Hvaða innri auðlindir býr þessi manneskja nú þegar yfir – og hvernig getum við virkjað þær?

Einfalt dæmi – hvaða heimilisverk finnst þér leiðinlegast? kannski að ryksuga? og hver er þinn uppáhalds styrkleiki? kannski góðverk eða þakklæti eða sköpun? – hvernig getur þú ryksugað í þeim anda? – ryksugað og þulið yfir þakklæti? eða hugsað um alla sem þú elskar, eða hugsað um gæskuna sem þú hefur sýnt í vikunni eða einhver sýnt þér, eða ryksugað með nýjum hætti… eða á nýjum tíma – fyrir vinnu, beint eftir vinnu áður en þú eldar eða með því að spila alltaf nýja tónlist á meðan eða hlusta á upplestur eða podcast eða uppáhalds útvarpsþátt?